Java e 27-të në elitën e futbollit kosovar do të mbyllet ditën e sotme (e diel) me dy ndeshje të tjera.

Lideri aktual i Superligës së Kosovës, Drita do të jetë nikoqire e Vllaznisë së Pozhoranit.

Njëherit kjo ndeshje do të jetë një ‘mini derbi lokal’, mes dy skuadrave nga i njëjti rajon.

Gjilanasit në këtë takim vijnë pas një serie prej katër fitoreve radhazi dhe synojnë të vazhdojnë edhe më tej me rezultate pozitive.

Ndërkohë Vllaznia në katër ndeshjet e fundit ka pësuar dy humbje dhe ka marrë dy barazime.

Në dy ndeshjet e zhvilluara mes këtyre dy skuadrave këtë edicion, Drita ka bilanc më të mirë pasi ka marrë dy fitore 0-4 dhe 3-0.

Bardh e kaltërtit do të synojnë fitoren e tretë në duel me pozhoranasit për tu distancuar në tri pikë me Prishtinën.

Interesant pritet të jetë edhe në Mitrovicë, ku kampioni në fuqi i Kosovës, Trepça ’89 do të jetë nikoqire e Vëllaznimit.

‘Minatorët’ kanë mbetur mbrapa për ta mbrojtur titullin e kampionit, ndërsa Vëllaznimi po lufton për t’i ikur barazhit.

Në dy ndeshjet e zhvilluara mes këtyre dy skuadrave, mitrovicasit kanë bilanc më të mirë me një fitore në shtëpi 1-0 dhe një barazim pa gola në Gjakovë 0-0.

Të dyja ndeshjet do të fillojnë nga ora 15:00. /Telegrafi/